26 January 2017

FYLLT TORTILLA MEÐ AVÓKADÓKJÚKLINGI

MATUR I UPPSKRIFT




Hugmyndir að góðum mat koma alls staðar að. Það fer allt eftir því hvernig maður er innstilltur og hverju maður leitar að, hvert maður sækist. Nýlega rakst ég á vinsælustu uppskriftirnar á Pinterest á síðasta ári og þar var hugmynd í ætt við þessa sem hér birtist. Hún vakti athygli mína fyrir einfaldleika, mér fannst hún henta sem góður matur á virkum degi og vera frekar holl og góð fjölskyldumáltíð sem við öll gætum viljað. Og það passaði. Hugmyndin af Pinterest sló í gegn og þess vegna er um að gera að setja hana inn á bloggið okkar og leyfa fleirum að njóta. Lesa nánar fyrir uppskriftina. 





4 kjúklingabringur

tortillur að eigin vali
góður ostur, rifinn eða í sneiðum / cheddar hentar vel en hentugt að nota afganga

1 dós sýrður rjómi
safi úr ½ lime
fínt rifinn börkur af ½ lime
salt og pipar
2 hæfilega þroskuð avókadó, skorin í meðalstóra bita
4 vorlaukar, fínt saxaðir
ferskt kóríander er mjög gott með, saxað

Skerið kjúklinginn í hæfilega stóra og jafna bita, steikið á pönnu í góðri olíu og saltið og piprið. Þegar kjúklingurinn er rétt steiktur, slökkvið undir pönnunni og látið kjúklinginn kólna aðeins.
Hrærið saman sýrðan rjóma, safa og börk úr lime, smakkið til með salti og pipar. Hrærið avókadó, vorlauk og kóríander saman við. Loks kjúklinginn.
Hitið pönnu að meðalhita. Setjið örlitla skvettu af góðri olíu á pönnuna. Dreifið osti á tortillu, setjið kjúklingablönduna í miðju hennar og brjótið brúnirnar yfir kjúklinginn svo tortillan lokist. Setjið á pönnuna og hitið tortilluna þar til osturinn bráðnar og kjúklingablandan hitnar. Snúið henni einu sinni til að forðast það að hún brenni. Berið fram.




No comments:

Post a Comment

Pin It button on image hover
Related Posts Plugin for WordPress, Blogger...