26 May 2016

HÆGELDAÐ LAMB MEÐ PARMESANOSTI OG ÞISTILHJÖRTUM

MATUR I UPPSKRIFT





Það fer einstaklega vel með lambakjöt að hægelda það. Það fer einnig einstaklega vel að hafa með því þistilhjörtu og parmesanost. Samsetningin er frekar óvenjuleg þar sem hjörtun og osturinn er með í pottinum allan tímann. En trúið okkur – þetta er svo góð samsetning að þessi réttur hefur skorað hátt á „uppáhalds-listanum” okkar. Upphaflega hugmyndin er ættuð úr frábærri matreiðslubók sem við eigum og notum mikið.




Hægeldað lamb með þistilhjörtum og parmesanosti


1,5 kg lambalæri eða annar góður biti af lambakjöti
Salt og svartur pipar
30 fersk myntulauf
60 g parmesanostur, skorinn í grófar sneiðar
180 g þistilhjörtu, marineruð í olíu
2 hvítlauksrif, gróft skorin
3 msk ólífuolía
2 b þurrt hvítvín
1 ¼ b vatn

Hitið ofn í 150 gráður. Saltið og piprið kjötið. Athugið að hér er líka hægt að taka beinið úr lærinu og fletja kjötið út, setja fyllinguna inn í og rúlla upp. Það er rosa gott en stundum óþarfi, sérstaklega ef kjötið er haft lengi í ofninum.

Fyllingin samanstendur af myntu, osti, þistilhjörtum og hvítlauk. Þetta má fara inn í rúlluna ef lambið er unnið á þann hátt, annars er þessu dreift ofan í ofnpottinn allt í kringum kjötið.
Við eldum alltaf í steyptum potti og notum hann líka á eldavélarhelluna. Potturinn er hitaður á hellu, olíu helt í pottinn og hún hituð. Lambið er steikt í heitri olíunni og brúnað á öllum hliðum. Tekið úr pottinum, víni helt í pottinn þar sem vínandinn gufar upp en vökvinn losar um gott bragð og krydd í pottinum. Kjötið er sett í pottinn aftur og fyllingin allt í kring. Þá fer vatn í pottinn. Lokið pottinum.

Setjið pottinn í ofninn og leyfið lambinu að hægeldast á 150 gráðum í allt að fjóra tíma, fer að sjálfsögðu allt eftir stærð lærisins. Ef þið viljið taka stytri tíma í eldamennskuna hækkið þið bara hitann.


Berið fram með kartöflum að eigin vali, soðnu nýju grænmeti, steiktu spínati og góðu brauði til að ná upp safanum.  Verði ykkur að góðu!



No comments:

Post a Comment

Pin It button on image hover
Related Posts Plugin for WordPress, Blogger...