09 March 2016

KANILFORMKAKA MEÐ RJÓMAOSTAKREMI

MATUR I UPPSKRIFT




Við hjónin erum fyrir margt löngu komin á eitthvert skeið þar sem formkökur heilla sérlega mikið. Það er eitthvað svo skemmtilega einfalt við þær og ekkert vesen fyrir utan það hvað þær eru góðar með kaffi og tei. Þessi uppskrift er blanda úr ýmsum áttum má segja; hún er hefðbundin hvít sandkaka, með kanilsnúðaívafi og kremi eins og gulrótarkaka. Góð blanda og virkilega þess virði að baka. Lesa nánar til að nálgast uppskriftina. 





Uppskriftin er stór en það er ákveðinn kostur að baka fleiri kökur og frysta til að eiga, ekki rétt? Þetta er uppskrift í tvær formkökur.


Kaka:
200 g mjúkt smjör
2 b sykur
6 egg
3 b hveiti
1 tsk salt
1 tsk lyftiduft
1 b sýrður rjómi
2 msk olía
1 msk vanilludropar

Hrærið saman smjör og sykur þar til létt í sér, hrærið egg saman við eitt í einu þar til úr verður mjúk blanda. Hellið þurrefnum saman við, þá sýrðum rjóma, olíu og dropum. Blandið vel en ekki hræra deigið lengi.


Kanilblanda:
6 msk mjúkt smjör
2/3 b púðursykur
1 msk hveiti
1 ½ tsk kanill
1 tsk vanilludropar

Hrærið allt hráefnið saman þar til áferðarfallegt og mjúkt.


Krem:
1 lítil dós hreinn rjómaostur
2 msk ósaltað og mjúkt smjör
1 ½ b flórsykur
¼ b mjólk eða matvinnslurjómi
1 tsk vanilludropar

Hrærið allt hráefnið saman þar til kremið veður slétt og huggulegt, um tvær mínútur.


Aðferð:
Hitið ofn í 180 gráður. Fyllið hvort formkökuform að 1/3 hluta með deiginu. Hellið varlega ¼ kanilblöndunnar yfir deigið í sitthvoru forminu. Takið gaffal og hrærið rólega í deiginu með hringlaga hreyfingum til að dreifa kanilblöndunni um deigið. Hellið rest af deigi yfir formin sem og kanilblöndunni og hrærið aftur á sama hátt.
Stingið í ofn og bakið í 50-60 mínútur. Ekki baka of mikið en þegar líður á bökunartímann þarf að stinga í kökuna til að ath hvernig staðan er á henni. Hún gæti þurft lengri tíma í ofninum. Takið úr ofninum og kælið áður en kremið er smurt á þær. Njótið vel!



No comments:

Post a Comment

Pin It button on image hover
Related Posts Plugin for WordPress, Blogger...