01 September 2015

PESTÓ-LASAGNA FYRIR KALDARI DAGA

MATUR




Það er einn réttur sem poppar upp í huga okkar þessa dagana frá Ítalíuferðinni okkar sem á sérlega vel við þegar farið er að kólna í veðri. Það er pestólasagna sem við smökkuðum á stað sem heitir Princi. Princi er bakarí og hádegisstaður í Mílanó (nota bene, hann er líka í London) sem er sérlega vinsæll. Ekki að undra því maturinn þar er hrikalega góður, brauðið og sætmetið. Við fengum okkur venjulegt lasagna að smakka sem og pestólasagna ásamt fleiri réttum og er pestóútfærslan eftirminnileg hugmynd að rétti, ótrúlega einföld. Ýtið á lesa nánar til að sjá samsetninguna. Uppskriftin er einnig birt á blogginu okkar á gottimatinn.is







Hún byggir á upprunalegri pestóhugmynd frá Genóa, uppskrift sem við gerum stundum frá Jamie Oliver, þar sem heimalagað pestó er borið fram með soðnum kartöflum og löngum, grænum baunum. Nema hér er hráefnið raðað saman í lög svo úr verður lasagna! Athugið að magn fer eftir smekk, sbr. hversu mikið pestó þið viljið o.s.frv. Hér að neðan er uppskrift af bechamelsósu en flestir eiga sér uppáhaldspestó eða kaupa gæðapestó í krukku og slík uppskrift er því óþörf þar sem þetta pestólasagna er meira hugmynd að góðum rétti en klár uppskrift.


Allt sem þarf er…

–góðar lasagnaplötur, mælum með því að kaupa ferskar og sjóða þær í rúma mínútu fyrir notkun
–grænt gæðapestó, heimalagað eða keypt tilbúið
–bechamelsósa, heimalöguð en hægt að kaupa tilbúna í sérvöldum verslunum
–soðnar kartöflur, skornar í sneiðar
–grænar, langar baunir (haricot), soðnar
–ferskur og rifinn parmesanostur
–fersk og rifin mozzarellakúla


Bechamelsósa er smurð í botninn á ofnföstu móti sem hentar undir lasagna. Lasagnaplötur eru lagðar yfir sósuna. Pestó er smurt á plöturnar. Kartöflur og baunir lagðar yfir. Sósu dreypt yfir að lokum (ekki spara hana). Þá lasagnaplötur yfir og haldið áfram koll af kolli og búin til nokkur lög. Þegar efsta lagið hefur verið lagt skulu lasagnaplötur vera efstar, þær eru smurðar með pestói og sósa sett yfir. Að lokum er rifnum mozzarella stráð yfir og þar yfir rifnum parmesanosti og er lasagnað loks sett í 180 gráðu heitan ofn í 20-30 mínútur eða þar til rétturinn er heitur í gegn. Þá er hann borinn fram og hans notið til hins ítrasta!


Bechamel-sósa:

50 g smjör
5 msk hveiti
4-5 dl mjólk
salt og pipar
½ tsk múskat
1 dl fínt rifinn parmesanostur

Bræðið smjör í potti. Hrærið hveiti saman og úr verður smjörbolla. Hellið smá mjólk út í og hrærið mjög vel þar til smjörbollan tekur að leysast upp. Hellið meiri mjólk og hrærið, haldið áfram í þessu ferli þar til smjörbollan er orðin að kekkjalausum jafningi. Athugið að magn á mjólk sem þarf í sósuna getur verið mjög mismunandi. Hrærið parmesanost saman við og látið hann bráðna vel. Kryddið með múskati og smakkið til með salti og pipar.







Gunnar Sverrisson / Home and Delicious



1 comment:

Pin It button on image hover
Related Posts Plugin for WordPress, Blogger...