21 September 2015

MÁNUDAGSMATUR – FISKPÆ FYRIR FJÖLSKYLDUNA

 MATUR




Ég held að ansi margir séu í því að leita leiða til að láta börnin sín borða og vilja meiri fisk. Fiskibollur eru ávallt vinsælar en það þarf eitthvað meira með, ekki satt? Börn vilja hreinlega ekki sömu útfærslur á fiski og fullorðnir og fullorðnir líklegri til að borða það sama og börnin vilja. Hvernig má finna milliveg? Ég eldaði fiskpæ upp á frekar gamaldags máta fyrir stuttu síðan og bauð fjölskyldunni. Þetta er uppskrift sem ég hef lengi haft í huga frá eiginkonu Jamie Oliver og langaði að prófa, sérstaklega á þeim forsendum að börnin þeirra eru víst hrifin! Góður réttur sem má breyta að vild og heimfæra samkvæmt kenjum kokksins og fjölskyldunnar. Eins og oft áður frá okkur þá er uppskriftin oft meira hugmynd til að vinna með og þessi fellur alveg í þann flokk. Ég set hana hérna inn með mínum áherslum og breytingum en hugmyndin er frá þeim hjónum komin. Lesa nánar til að sjá uppskriftina. 





 Halla Bára / Home and Delicious


Kartöflumús (frá deginum áður) eða stappaðar kartöflur með smjöri og pínu mjólk

4 egg, harðsoðin, skurnin tekin af og þau skorin í minni bita

700 g fiskur að eigin vali eða sjávarfang; hvítur fiskur, reykt ýsa, lax, rækjur

200 g spínat, saxað (má mýkja það á pönnu í smá smjöri eða olíu, vökvinn tekinn frá)

Rifinn gratínostur


Ég gef ykkur hugmyndir að tveimur hvítum sósum sem má nota í réttinn, allt eftir því hvað þið kjósið

Hvít sósa I

50 g smjör
50 g hveiti
6 dl mjólk
2 tsk dijon-sinnep
safi úr hálfri sítrónu
50 g rifinn gratínostur
salt og pínu pipar
spínat, ferskt eða mýkt (sjá að ofan)

Bræðið smjör í potti á miðlungshita. Hrærið hveiti saman við, látið malla í nokkrar mínútur og hrærið í á meðan eða þar til smjörbollan fer að fá á sig pínu gullin blæ. Hellið mjólk saman við í smá skömmtum og hrærið sósuna til þar til úr verður kekkjalaus jafningur. Látið hana malla í nokkrar mínútur á vægum hita. Hrærið ost saman við sósuna, látið hann bráðna saman við. Smakkið til með salti og pipar. Hrærið spínat saman við og blandið vel. Spínatið má fara ferskt og saxað út í sósuna. Athugið að í sósuna má fara ýmislegt annað grænmeti, eins og t.d. frosnar grænar baunir.



Hvít sósa II

500 ml sýrður rjómi
2 tsk dijon-sinnep
safi úr hálfri sítrónu
50 g rifinn gratínostur
salt og pínu pipar

Allt hráefnið hrært saman. Ferskt spínatið er hrært saman við sósuna.


Hitið ofn í 200 gráður. Skerið fiskinn í litla bita og dreifið úr honum í mót sem má fara inn í ofn. Dreifið úr eggjunum yfir fiskinn. Hellið sósunni yfir fiskinn og dreifið vel úr henni, hvort sem þið notið þá heitu eða köldu. Kartöflustappan eða stöppuðu kartöflurnar fara yfir allt saman og loks rifinn ostur. Hitað í ofni í 40-45 mínútur og borið fram með salati, brauði, bökuðum baunum eða hverju sem þið viljið.







No comments:

Post a Comment

Pin It button on image hover
Related Posts Plugin for WordPress, Blogger...