30 April 2015

PIPAROSTAPASTA MEÐ BEIKONI OG BAUNUM

MATUR




Hugmynd að mat fyrir helgina. Þessi pastaréttur var eldaður um páskana hjá okkur – ferskar pastalengjur með piparostasósu, beikoni og grænum baunum. Virkilega gott og góður fjölskyldumatur. Það þarf alls ekki að gera pasta sjálfur til að rétturinn virki sem skyldi. Þvert á móti er hægt að nota hvaða pasta sem er í þetta, en tagliatelle myndi henta vel. Þá mælum við líka með því að kaupa ferskt pasta til að nota sem og kaupa ferskar lasagnaplötur og skera þær í lengjur. Svona til að auka á fjölbreytnina í pastaréttunum almennt.
En þessi samsetning er eitthvað sem hægt er að mæla með, piparostur og beikon klikkar ekki en grænu baunirnar (athugið ekki niðursoðnar heldur frosnar) gera algjörlega útslagið í réttinum.  Uppskriftin er einnig birt á www.gottimatinn.is þar sem við bloggum um mat. Til að lesa uppskriftina ýtið þið á Lesa nánar hnappinn. Verði ykkur að góðu!






Hlutföllin í uppskriftinni eru miðuð við fjóra


Pasta að eigin vali, soðið al dente
1 dl pastasoð

Piparostur
2-3 dl rjómi

10-12 beikonsneiðar, eldaðar og skornar í bita
3 dl grænar baunir, frosnar úr poka, búið að þýða

Rifinn parmesanostur


Skerið ostinn aðeins niður og bræðið hann í rjómanum á miðlungshita svo úr verði slétt og fín sósa. Eldið beikonið í ofni eða á pönnu, skerið í pena bita. Þýðið baunirnar.
Sjóðið pastað sem þið kjósið að nota, al dente, takið einn desilítra af pastasoðinu og geymið. Látið renna af pastanu en alls ekki láta það þorna, þá missir pastað mýktina og sósan leikur ekki eins vel um það.
Hellið pastanu í skál, fat eða pott. Hellið sósunni yfir það, hrærið hana saman við. Ef hún er ekki nægilega mikil eða þunn þá er gott að hella pastasoðinu yfir og hræra vel. (Við gerum það að vísu nánast alltaf með pastasoðið, og með mjög marga rétti, til að ná góðri áferð á pastasósur). Blandið beikoni og baunum saman við.
Berið strax fram með parmesanosti… og svona til að kóróna réttinn má hafa með honum gott brauð eða hvítlauksbrauð.






No comments:

Post a Comment

Pin It button on image hover
Related Posts Plugin for WordPress, Blogger...