01 June 2013

matur: ein uppáhalds – kjúklingur á brauði

Mynd hbg (því gs ekki á staðnum)

Hér er ein uppáhaldshugmynd að góðum mat. Skora á ykkur að prófa þetta sem allra fyrst. Hún hefur ótal útgáfur en þessi finnst mér alltaf best og einföldust. Um er að ræða kjúkling á brauði. Hljómar einfalt og er einfalt. Hér snýst allt um smekk og vilja þess sem er að fara að borða en ég tiltek það sem er gott að gera:

kjúklingur:
4 kjúklingabringur
4 msk ólífuolía
2 msk gott edik
2 msk lime- eða sítrónusafi, gott að rífa börkinn mjög fínt með
salt og pipar
1 msk sætt dijon sinnep eða korn sinnep, má sleppa

Hráefnið hrært saman í marineringuna. Hver kjúklingabringa skorin þvert og lögð í marineringuna, velt vel upp úr henni. Látin liggja í marineringunni í a.m.k. klukkustund. Mér finnst einfaldast að skella kjúklingnum í ofn að þessu loknu, á 180 gráður í um 20-30 mínútur. Auðvitað má steikja hann líka og allt eins grilla. Tíminn snýst algjörlega um það hversu þykkar bringurnar eru. Berið þær fram heitar.

meðlæti:
gæðabrauð – baguetta, súrdeigsbrauð
100 g smjör
2 hvítlauksrif, söxuð
2 msk góð ólífuolía
klettasalat 
ferskt kóríander
mosarellaostur í sneiðum

Bræðið smjör á vægum hita í potti, setjið hvítlauk saman við og látið malla á vægum hita. Hrærið olíuna saman við. Skerið súrdeigsbrauð í sneiðar eða baguettu þvert og grillið örlítið í heitum ofni. 

samsetning:
Dreypið hvítlaukssmjörinu yfir brauðið. Leggið mosarellasneiðar ofan á, kjúkling, klettasalat og kóríander. Gott að strá smá gæðasalti og pipar yfir. Berið fram. 

Athugið að þetta er ótrúlega þægilegur og góður réttur sem má bera fram með svo miklu meira meðlæti. Tómatar, mosarella og fersk basilíka klikkar til dæmis ekki. Allt grænmeti, ferskt eða grillað. Ostar af ýmsu tagi. Njótið á þann hátt sem stemmning og stuð segir til um! 


No comments:

Post a Comment

Pin It button on image hover
Related Posts Plugin for WordPress, Blogger...