19 April 2013

matur: gæðapylsur og gott fyrir helgina

Gunnar Sverrisson / Home and Delicious

Veðrið er ekki alveg að segja okkur að Sumardagurinn fyrsti sé í næstu viku EN samt langar marga til að grilla um helgina. Þá er um að gera að púsla saman þægindum (comfy food), gæðafæði og grilli. Hér er okkar hugmynd að þeirri samsetningu; pylsur, kartöflustappa og baunir! Ok, viðurkenni að þetta finnst mér alltaf klassík (SS, stappa úr pakka og Heinz) en við erum að mæla með hinu afbrigðinu. Gæðapylsur, heimalagaðar eða frá KjötPól, heimalöguð stappa með smá sinnepi og heimalöguð tómatsósa með smjörbaunum. Algjör lúxusmáltíð og fyrir þá sem kjósa bjór eða léttvín með þá svíkur það ekki. Hér þarf ekki uppskrift. Bara segja frá því sem fer vel saman. 

Pylsur: Timíanpylsur, chorizo-pylsur, ítalskar morgunverðarpylsur og svo má lengi telja. Kaupa blöndu af pylsum, grilla þær allar og bera fram. Smakka á öllu.

Kartöflustappa: Hér stappaði ég ekki kartöflurnar alveg niður heldur hélt stöppunni grófri. Tók soðnar kartöflur og setti slatta af smjöri yfir þær sem ég lét bráðna. Hellti yfir smá matreiðslurjóma og lét suðuna koma upp. Leyfði kartöflunum aðeins að malla á mjög vægum hita í rjómasmjörblöndunni og marði þær svo niður. Þá set ég salt, pipar og múskat og fyrir þá sem vilja má alveg setja rifinn parmesanost út í. Þá er gott að bragðbæta með sinnepi að eigin vali eða a.m.k. að bera gott sinnep fram með matunum. 

Tómatsósa með smjörbaunum: Heimalöguð tómatsósa er eitthvað sem oft er gert er á heimilinu. Ég nota alltaf rauðlauk sem látinn er malla í góðri ólífuolíu, það má setja hvítlauk með. Set smá skvettu af ediki yfir og læt það gufa upp, eða smá vín ef er til afgangur í flösku. Þá kemur dós af góðum niðursoðnum tómötum. Látið malla sem lengst en nokkrar mínútur duga fyrir fólk á hraðferð. Smakka til með salti og pipar, má setja chillípipar. Set alltaf smá sykur í tómatsósu, skiptir máli. Þá koma baunirnar og það þarf að láta renna vel af þeim. Rifin basilíka er góð út í þetta síðustu mínúturnar eða þann tíma sem baunirnar þurfa til að hitna vel í gegn. Auðvitað má nota aðrar baunir en smjörbaunir. 

Verði ykkur að góðu - þið verðið ekki svikin af þessari blöndu! 




No comments:

Post a Comment

Pin It button on image hover
Related Posts Plugin for WordPress, Blogger...