08 March 2013

matur helgarinnar – bolognese af heilum huga


Gunnar Sverrisson fyrir Home and Delicious

Spagettí bolognese er einstakur réttur og ég mæli með honum í helgarmatinn að þessu sinni. Margir hrista eflaust höfuðið og finnst nú ekki merkilegt að hafa hakk og spagettí í matinn um helgina. En vel elduð og vönduð kjötsósa sem þessi, sem fær að malla lengi og hugur og hjarta er sett í eldamennskuna ... fátt sem kemst nálægt henni. 
Svona matarmikil og rík kjötsósa eins sem þessi bolognese sósa er, hentar frábærlega í lasagna og cannelloni. En eins og með svo margt, þá skiptir eldunartíminn miklu máli og því lengur sem hún fær að malla því betri verður hún. Þegar við eldum bolognese hérna heima þá leyfum við henni að vera á eldavélinni á vægum hita í 3 til 5 klukkustundir og við eldum alltaf vænan skammt til að eiga afganga og frysta, einmitt til að geta gripið í og gert lasagna eða canneloni með stuttum fyrirvara. Bolognese er dásemd og sömuleiðis hentugur matur í stór matarboð. Ummmm – og ekki spillir að hafa gott vín með matnum, forrétt og eftirrétt... Gera þetta almennilega en á ljúfu nótunum. Þetta er helgarmaturinn! 
 

Bolognese

5 msk ólífuolía
2 laukar, smátt skornir
2 sellerístilkar, smátt skornir
4 gulrætur, smátt skornar
10 beikonsneiðar, smátt skornar
600 g nautahakk
400 g svínahakk
2 msk tómatkraftur
3 dósir niðursoðnir tómatar
salt og chillípipar, í duftformi
hnefi basilíka, söxuð

Mýkið lauk, sellerí og gulrætur í stórum potti í olíu og við meðalhita þar til vel mjúkt. Setjið hakkið og beikonið saman við grænmetið og hrærið vel saman. Hrærið tómatpúrruna saman við og hellið niðursoðnu tómötunum út í. Saltið örlítið og piprið með chillí og látið kjötsósuna malla sem lengst! Basilíkan fer út í þegar vel er liðið á eldunina. Best er að láta kássuna malla á vægum hita í 3-5 klukkutíma og leyfa henni svo að standa aðeins áður en hún er borin fram. Mörgum þykur hún betri daginn eftir. Smakkið sósuna til með salti og smá chillípipar. Berið fram með spagettíi og parmesanosti.

No comments:

Post a Comment

Pin It button on image hover
Related Posts Plugin for WordPress, Blogger...